"Автотээврийн хяналтын улсын байцаагчийн хяналт бүртгэлийн системийг зохиож хөгжүүлэх зөвлөх үйлчилгээ"-ний ажлын дунд шатны тайланг сонслоо.

Тус яамнаас 2025 онд "Автотээврийн хяналтын Улсын байцаагчийн Хяналт бүртгэлийн системийг зохиож, хөгжүүлэх” зөвлөх үйлчилгээний нээлттэй тендерийг зарласан бөгөөд уг тендерт “Инфокон” ХХК шалгарч, гэрээ байгуулсан.

Гэрээт ажлын хүрээнд ажлын даалгаврын дагуу Автотээврийн улсын байцаагч нь системийг ашиглан автотээврийн хяналт бүртгэлийг хийх, зөрчлийг бүртгэх, торгох арга хэмжээг авах саналаа ахлах байцаагчид шилжүүлэх зэрэг боломжтой байхаар веб болон мобайл аппликейшныг хөгжүүлж байна.

Дээрх системийн хөгжүүлэлт 50 хувийн гүйцэтгэлтэй байгаа бөгөөд хөгжүүлэлтийн ажлыг эрчимжүүлэх чиглэлээр талууд санал солилцов.

Мэргэжилтнүүдийн хэлж байгаагаар системд олон байгууллагын мэдээллийн сангаас мэдээлэл татах хэрэгцээ шаардлага гарч байсан ба Цахим хөгжил, харилцаа холбооны яамтай мэдээлэл солилцох систем “ХУР”-ыг ашиглах гэрээг байгуулж гэрээний дагуу шаардлагатай мэдээллийг татах, шалгах боломжтой болсон байна. Цаашид уг системийг нэвтрүүлэхтэй холбоотойгоор эрсдлийн үнэлгээг хийлгэх, турших, зөрчлийн мэдээллийн нэгдсэн сантай холбох ажлууд хийгдэх юм.  

Энэхүү системийг зам, тээврийн хяналтын улсын байцаагчийн үйл ажиллаганд гол төлөв ашиглах тул хууль, дүрэм, журам, стандартад нийцүүлэн хөгжүүлэхэд СХШҮДАГ-аас анхаарч ажиллахаар болов.

Дашрамд сануулахад, зам, тээврийн хяналтын улсын байцаагч нь Зөрчил шалган шийдвэрлэх тухай хуулийн 2.4 дүгээр зүйл болон холбогдох бусад зүйл, заалтын хүрээнд хуулиар харъяалуулсан зөрчлийг газар дээр нь, эсхүл хялбаршуулсан журмаар шалган шийдвэрлэх, түүнчлэн зөрчлийг хэрэг бүртгэлт явуулах эрх хуулиар олгогдсон бөгөөд Зөрчил шалган шийдвэрлэх тухай хуулийн 1.8 дугаар зүйлийн 10 дахь хэсэгт “Эрх бүхий албан тушаалтны эрх зүйн байдлыг тус тусын хуулиар тогтооно.” гэж заасны дагуу Төрийн хяналт, шалгалтын тухай хуульд заасан чиг үүргийг хэрэгжүүлдэг “эрх бүхий албан тушаалтан” юм.