Зам, тээврийн яамны Төрийн нарийн бичгийн дарга М.Баярмагнай Европын сэргээн босголт, хөгжлийн банкны Суурин төлөөлөгч Жахан Шамсиев тэргүүтэй төлөөлөгчдийг өнөөдөр /2026.05.07/ хүлээн авч уулзлаа.

Уулзалтаар талууд Зам, тээврийн салбарын хамтын ажиллагаа, цаашид хэрэгжүүлэх төсөл хөтөлбөрүүдийн талаар санал солилцлоо.

Уулзалтын эхэнд Төрийн нарийн бичгийн дарга М.Баярмагнай Европын сэргээн босголт, хөгжлийн банк /ЕСБХБ/ манай улсын хөгжлийн олон салбарт хөрөнгө оруулж, хамтран ажиллаж байгаад талархал илэрхийлээд Улаанбаатар-Дархан чиглэлийн авто замын төсөл амжилттай хэрэгжиж,  одоогоор нийт ажлын гүйцэтгэл 98.4 хувьд хүрснийг дуулгалаа.

Тэрбээр “Улаанбаатар-Дархан чиглэлийн авто замын төсөл нь ЕСБХБ-тай хамтран хэрэгжүүлж анхны томоохон төсөл юм. Харин одоо Чойр-Хөшигийн хөндий чиглэлийн авто замыг 4 эгнээ болгон өргөтгөн шинэчлэх төслийг хамтран хэрэгжүүлэхэд бэлэн болоод байна. Энэхүү зам бол ачаа тээврийн эргэлт, бүсийн хөгжлийн шинэ гарцыг нээсэн стратегийн чухал ач холбогдолтой авто зам юм. Ялангуяа босоо тэнхлэгийн зам нь төмөр замын салбарт ч, олон улсын чанартай авто замын хувьд ч Ази-Европыг холбосон эдийн засгийн том коридор юм. Бидний зүгээс энэхүү төслийг хэрэгжүүлэхэд шаардагдах төслийн урьдчилсан судалгаа, техник-эдийн засгийн үндэслэл, зураг төслийг боловсруулах, цаашлаад санхүүжүүлэх талаар хамтран ажиллах саналтай байна” хэмээн дурдлаа.

Харин ЕСБХБ-ны Суурин төлөөлөгч Жахан Шамсиев “Манай банкны зүгээс Чойр-Хөшигийн хөндий чиглэлийн авто замыг 4 эгнээ болгон өргөтгөн шинэчлэх ажлыг маш чухалчилж байгаа. Үүний дагуу бэлтгэл ажлаа хангаад явж байна. Эхний ээлжинд төслийг эхлүүлэхийн тулд санхүүжилтийн үндсэн нөхцөлийг тусгасан “Мандатын бичиг”-т талууд гарын үсэг зурах шаардлагатай байдаг. Энэхүү бичгийг үзэглэвэл дараагийн ажилдаа ороход бэлэн байна” гэлээ.

“Мандатын бичиг”-ийн хувьд Зам, тээврийн сайд гарын үсэг зурсан байгаа бөгөөд Эдийн засгийн хөгжлийн яам руу холбогдох бичиг ирүүлсэн байгаа аж.

Мөн уулзалтын төгсгөлд Зам, тээврийн яамнаас Увс аймгийн Улаангом сумаас Баруунтуруун сумд хүртэлх чиглэлийн 164.5 км хатуу хүчилттай авто замын төслийг ЕСБХБ-тай хамтран хэрэгжүүлэх тухай албан бичгийг Эдийн засгийн хөгжлийн яам руу хүргүүлж байгаа. Энэ замын зураг төсөл хийгдсэн бөгөөд ЕСБХБ -тай хамтран хэрэгжүүлэх саналтай байгаа тул дэмжиж ажиллахыг хүслээ.

Хариуд нь Суурин төлөөлөгч Жахан Шамсиев хэлэхдээ “Бид шинэ төслийг хэрэгжүүлэхдээ таатай байх болно. Зураг төсөл нь хийгдсэн гэдэг нь маш том давуу тал болно. Та бүхэн дотооддоо бүх хэлэлцээрээ жигдлээд ЕСБХБ руу албан хүсэлт явуулбал бид хамтран ажиллахдаа таатай байх болно” гэлээ.