Олон улсын тээврийн форум (ITF)-аас жил бүр Герман улсын Лейпциг хотноо зохион байгуулдаг дээд хэмжээний уулзалтаар энэ жил дэлхийн тээврийн салбарын хамгийн эмзэг, тулгамдсан асуудлын нэг болох “тээврийн тогтвортой, уян хатан байдлыг хэрхэн санхүүжүүлэх вэ” гэсэн сэдвийг голлон хөндөж байна.

Тухайлбал, сүүлийн жилүүдэд дэлхийн тээвэр логистикийн салбарт геополитикийн тодорхойгүй байдал, уур амьсгалын өөрчлөлтөөс үүдэлтэй эрсдэлүүд нэмэгдэж байгаа бөгөөд эдгээр асуудал нь тээврийн салбарт дэд бүтцийн уян хатан байдлыг бэхжүүлэх шаардлагыг улам бүр хурцатгаж байгааг хуралд оролцогчид хэлж байна.

Тиймээс Олон улсын тээврийн форум (ITF)-2026 дээд хэмжээний уулзалтаар, тээврийн дэд бүтцийг бэхжүүлэх урт хугацааны санхүүжилт, төр, хувийн хэвшлийн түншлэл, эрсдэл хуваалцах механизм, дижитал шилжилт болон тогтвортой хөгжлийн уялдаа холбоо зэрэг асуудлыг голлон хэлэлцэж байна.

Мөн тээврийн системийн уян хатан байдлыг хангахын зэрэгцээ зардлыг хэрхэн үр ашигтай санхүүжүүлэх тухай бодлогын шийдлүүдийг эрэлхийлж буй нь энэ удаагийн уулзалтын гол анхаарал татсан сэдэв болж байна.

Уг арга хэмжээг зохион байгуулагч Олон улсын тээврийн форум ITF нь тээврийн бодлогын чиглэлээр дагнан үйл ажиллагаа явуулдаг цорын ганц Засгийн газар хоорондын дэлхийн байгууллага бөгөөд энэ жил 20 жилийн ойтойгоо золгож буй юм. Тус байгууллагаас зохион байгуулдаг энэхүү тээврийн салбарын чуулга уулзалт нь өнөөдөр олон улсын бодлогын хэлэлцүүлгийн чухал талбар болсныг оролцогчид онцолж байна.

Дэлхийн тээврийн форумд 69 улсын төлөөлөл оролцож байна

Энэ удаагийн чуулга уулзалтад ITF-ийн 69 гишүүн орны тээврийн сайд нар, олон улсын байгууллага, хувийн хэвшил, иргэний нийгмийн өндөр түвшний төлөөллүүд өргөн бүрэлдэхүүнээр оролцож байна.

Форумын нэгдсэн хуралдаанд оролцож буй онцлох төлөөлөгчдөөс дурдвал, Олон улсын тээврийн форум ITF-ийн Ерөнхий нарийн бичгийн дарга Ён Тэ Ким, БНХАУ-ын Тээврийн дэд сайд Ян Ли, Азербайжан Улсын Дижитал хөгжил, тээврийн сайд Рашад Набиев, Испани Улсын Тээвэр ба тогтвортой хөдөлгөөний сайд Оскар Пуэнте, НҮБ-ын Амьдрах орчны хөтөлбөрийн гүйцэтгэх захирал Анаклаудиа Россбах, НҮБ-ын Замын хөдөлгөөний аюулгүй байдлын тусгай элч Жан Тодт, “Volvo Buses”компанийн ерөнхийлөгч Анна Вестерберг, “DEKRA”-ийн гүйцэтгэх захирал Стэн Зуркевич нар оролцож байна.

Монгол Улс дэлхийн тээврийн форумд өндөр түвшинд оролцож байна

Монгол Улсаас Зам, тээврийн сайд Б.Дэлгэрсайханаар ахлуулсан ажлын хэсгийнхэн тээврийн салбар дахь олон улсын хамтын ажиллагааг өргөжүүлэх, тээврийн салбарын санхүүжилтийн шийдлүүдийг судлах, туршлага судлах чиглэлээр идэвхтэй оролцож байна.

Ажлын хэсгийн бүрэлдэхүүнд ЗТЯ-ны Төрийн захиргааны удирдлагын газрын дарга Б.Болор-Эрдэнэ, Гадаад хамтын ажиллагааны хэлтсийн дарга Б.Нямдаваа, Төмөр замын газрын дарга Б.Артур, Автотээврийн үндэсний төв (АТҮТ)-ийн захирал Ц.Батсайхан нар оролцож, тээврийн форумын хүрээнд зохион байгуулагдаж буй сайд нарын хуралдаан, шинжээчдийн хэлэлцүүлэг, олон улсын уулзалтуудад оролцож байна.

Монгол Улсын хувьд далайд гарцгүй орны онцлог, бүс нутгийн ложистикийн сорилтууд, транзит тээврийн боломжуудын хүрээнд тээврийн салбарын уян хатан байдал, тогтвортой системийг хөгжүүлэх асуудал нь онцгой ач холбогдолтой хэвээр байна. Иймд энэхүү форум нь Монгол Улсын хувьд тээврийн салбарын уян хатан байдал, транзит тээврийн боломж, бүс нутгийн холболтыг сайжруулах, тогтвортой санхүүжилтийн шинэ механизмуудыг судлахад онцгой ач холбогдолтой болж байгааг оролцогчид хэлж байна.