Монгол Улсын Засгийн газрын гишүүн, Зам, тээврийн сайд Б.Дэлгэрсайхан өнөөдөр (2026.05.06) ХБНГУ-ын Лайпциг хотноо Азербайжан Улсын Цахим хөгжил, тээврийн сайд Рашад Набиевтэй уулзлаа.

Уулзалтын үеэр талууд хоёр улсын тээврийн салбар дахь хамтын ажиллагааг өргөжүүлэх асуудлаар санал солилцож, агаарын тээврийн харилцааг өргөжүүлэх гэрээ хэлэлцээрт гарын үсэг зурлаа.

Зам, тээврийн сайд Б.Дэлгэрсайхан уулзалтын эхэнд, Монгол Улс өнөөдрийн байдлаар агаарын тээврийн салбарт 50 гаруй улстай хэлэлцээр байгуулан хамтран ажиллаж байгааг дурдаад, энэ хүрээнд Европын 20 гаруй оронтой идэвхтэй хамтын ажиллагаа хөгжүүлж байгааг онцоллоо.

Мөн тэрээр энэ өдөр Улаанбаатар-Баку чиглэлд шууд нислэг үйлдэх эрхзүйн боломж бүрдэж, удаан хугацаанд яригдсан асуудал бодит ажил хэрэг болж байгаад сэтгэл хангалуун байгаагаа илэрхийллээ.

Автотээврийн салбарт Азербайжан Улс нь Монгол Улсын хувьд чухал түнш, түшиц улс болохыг онцлон тэмдэглэж, Ази-Европыг холбосон транзит тээврийг хөгжүүлэх хүрээнд дунд болон төв коридорыг үр ашигтай ашиглах, ачаа тээврийн урсгалыг Европ руу нэмэгдүүлэх бодлого баримталж байгааг дурдлаа. Энэ хүрээнд Европын орнуудтай хамтын ажиллагааг өргөжүүлж буй бөгөөд Олон улсын тээврийн форумын энэхүү дээд түвшний уулзалт арга хэмжээ нь бодит үр дүн гаргахад өндөр ач холбогдол үзүүлж болж байгааг онцоллоо.

Цаашид хоёр улсын автотээврийн салбар дахь хамтын ажиллагааг өргөжүүлж, Азербайжан Улстай өргөн хүрээнд хамтран ажиллах сонирхолтой байгаагаа илэрхийллээ.

Азербайжан Улсын Цахим хөгжил, тээврийн сайд Рашад Набиев энэ үеэр хэлэхдээ, автотээврийн салбарт тус улс нь өнгөрсөн жилд 30 мянга гаруй тонн ачаа тээвэрлснийг дурдаад, цаашид энэ хэмжээг нэмэгдүүлэх чиглэлд анхаарч ажиллаж байгааг онцоллоо. Мөн автотээврийн салбарын хамтын ажиллагааг өргөжүүлэх хүрээнд холбогдох гэрээ хэлэлцээрийг ойрын хугацаанд байгуулах боломжтой гэж үзэж байгаагаа илэрхийллээ.

Мөн Азербайжан Улсын тээврийн сайд хоёр улсын хооронд олгогддог автотээврийн зөвшөөрлийн бичгийн тоог нэмэгдүүлэх шаардлагатайг тэмдэглээд, энэ асуудлаар санал солилцохоор Монголын талыг Баку хотод ойрын хугацаанд айлчилж хамтран ажиллах урилга хүргүүлснээ дуулгав.

Уулзалтын төгсгөлд, хоёр улсын агаарын тээврийн хамтын ажиллагааг өргөжүүлэх чиглэлд Зам, тээврийн сайд Б.Дэлгэрсайхныг идэвх санаачилга гарган ажиллаж байгаад талархал илэрхийлж, Монгол Улсын дотоодын авиа компаниуд Улаанбаатар-Баку чиглэлд нислэг үйлдэх хүсэлт гаргавал Азербайжан Улсын тээврийн сайд дэмжин ажиллахад бэлэн байгаагаа илэрхийллээ.