Монгол Улсын Засгийн газрын гишүүн, Зам, тээврийн сайд Б.Дэлгэрсайхан өнөөдөр (2026.05.07) ХБНГУ-ын Лайвциг хотноо зохион байгуулагдаж буй Олон Улсын Тээврийн форумын үеэр “Олон Улсын Автотээврийн холбоо”-ны Ерөнхий нарийн бичгийн дарга Умберто де Преттотой уулзлаа.

Олон Улсын Автотээврийн Холбоо (IRU) нь дэлхийн автотээвэр, логистик, транзит тээврийн салбарын хамгийн том байгууллагуудын нэг бөгөөд олон улсын автотээврийн эрх зүйн орчин, TIR систем, тээврийн дижитал шилжилт, мэргэшсэн боловсон хүчин бэлтгэх чиглэлээр гишүүн орнуудтай хамтран ажилладаг байгууллага юм.

Уулзалтын эхэнд Зам, тээврийн сайд Б.Дэлгэрсайхан ноён Умберто де Преттотой биечлэн уулзаж буйдаа баяртай байгаагаа илэрхийлж, Монгол Улс олон улсын автотээврийн эрх зүйн орчныг бүрдүүлэхэд тогтмол анхаарч ирснийг онцоллоо.

Мөн тэрээр Монгол Улс өнөөдрийн байдлаар 25 улстай олон улсын автотээврийн харилцааг шууд хэрэгжүүлэх эрх зүйн боломжийг бүрдүүлэн ажиллаж байгааг дурдаад, олон улсын худалдаа, тээврийг хөнгөвчлөх хүрээнд төрөл бүрийн конвенц, хэлэлцээрүүдэд үе шаттайгаар нэгдэн орж, TIR системийг амжилттай хэрэгжүүлж байгааг тэмдэглэн хэллээ.

Тухайлбал, Монгол Улс 2001 онд TIR конвенцод нэгдэн орсноос хойш тус системийн хэрэглээ эрчимтэй өсөж, 2016 онд Монголын тээвэрчид нийт TIR тээвэрлэлтийн ердөө нэг хувийг гүйцэтгэж байсан бол 2025 онд энэ үзүүлэлт 47 хувьд хүрч, тээвэрлэлтийн тоо 56-аас 4711 болж өссөн нь салбарын өрсөлдөх чадвар, чадавх эрс нэмэгдсэнийг харуулж байгааг онцоллоо.

Энэ үеэр Монгол Улсын Зам, тээврийн яам болон “International Road Transport Union” хооронд Харилцан ойлголцлын санамж бичигт гарын үсэг зурлаа.

Санамж бичгийн хүрээнд талууд олон улсын автотээврийн салбарын хамтын ажиллагааг өргөжүүлэх, хүний нөөцийн чадавхыг бэхжүүлэх, олон улсын сургалтын стандартыг Монгол Улсад нэвтрүүлэх, TIR системийн хэрэгжилтийг дэмжих, тээврийн дижитал шилжилтийг эрчимжүүлэх чиглэлээр хамтран ажиллахаар тохиролцлоо.

Түүнчлэн IRU-аас Монголын автотээврийн салбарын хөгжилд үзүүлж ирсэн дэмжлэг, тэр дундаа “Монголын автотээвэрчдийн нэгдсэн холбоог чадавхжуулан бэхжүүлэх” төслийн хүрээнд дэмжин ажиллаж байгаад талархал илэрхийллээ.

Энэхүү хамтын ажиллагааны үр дүнд Монголын автотээвэрчдийн нэгдсэн холбооны сургалтын төв “IRU Academy”-ийн магадлан итгэмжлэл авах бэлтгэлээ хангаж, аюултай ачаа тээвэр, ачааг аюулгүй ачих, бэхлэх, олон улсын мэргэшсэн жолоочийн сургалт зэрэг олон улсад хүлээн зөвшөөрөгдсөн сургалтуудыг зохион байгуулах боломжийг бүрдүүлэхийн төлөө хичээн ажиллаж байгааг онцоллоо.

Мөн Монгол Улс “Олон улсын автотээвэрлэлт гүйцэтгэх тээврийн хэрэгслийн багийн ажлын тухай Европын хэлэлцээр” (AETR), “Аюултай ачааг авто замаар олон улсад тээвэрлэх тухай хэлэлцээр” (ADR), “Түргэн муудах хүнсний бүтээгдэхүүний тээвэрлэлтийн тухай хэлэлцээр” (ATP) зэрэг олон улсын чухал конвенцод нэгдэн орох ажлыг эрчимжүүлж байгааг танилцууллаа.

Уулзалтаар мөн TIR баталгааны хэмжээ улс орнуудад харилцан адилгүй байгаагаас үүдэн тээвэрлэгчдэд тулгарч буй хүндрэлтэй асуудлуудын талаар мөн хөндөн ярилцлаа.

Уулзалтын төгсгөлд талууд олон улсын автотээврийн хамтын ажиллагааг өргөжүүлэх, тээврийн дижитал шилжилтийг эрчимжүүлэх, хил дамнасан тээврийн үр ашгийг нэмэгдүүлэх чиглэлээр хамтран ажиллахаа илэрхийллээ.