Зам, тээврийн яамны Төрийн нарийн бичгийн дарга М.Баярмагнай OPEC сангийн Ази, Номхон далайн бүс хариуцсан ахлах менежер Тошифүми Казаока, Тээврийн ахлах мэргэжилтэн Хуан Гонзалес тэргүүтэй төлөөлөгчдийг өнөөдөр /2026.05.11/ хүлээн авч уулзлаа.

Уулзалтаар талууд “Шинэ Хархорум” хотын төлөвлөлт, бүтээн байгуулалтын төсөл болон Улаанбаатар-Лүн-Хархорин чиглэлийн 101.7 км авто замыг үе шаттайгаар өргөтгөн шинэчлэх ажлын санхүүжилтийн талаар санал солилцлоо.

Уулзалтын эхэнд Төрийн нарийн бичгийн дарга М.Баярмагнай “Шинэ Хархорум” хотын бүтээн байгуулалт бол үндэсний хэмжээний стратегийн төсөл бөгөөд үүнийг дагасан Улаанбаатар–Шинэ Хархорум чиглэлийн авто зам нь суурь дэд бүтцийн гол төсөл болоод байгааг онцоллоо.

Төслийн хувьд нийт өртөг нь 380 сая ам.доллар бөгөөд тээвэр логистикийн зардал, хугацааг бууруулах; аялал жуулчлалын бүсүүдийн хүртээмжийг нэмэгдүүлэх эдийн засгийн ач холбогдолтой юм.

Хариуд нь Ази, Номхон далайн бүс хариуцсан ахлах менежер Тошифүми Казаока төсөлтэй холбоотой мэдээллийг түргэн шуурхай өгч, мэдээллээр ханган ажилласанд талархал илэрхийлээд “Бид өнөөдөр хоёр зорилготойгоор Монголд ирсэн.

Нэгдүгээрт, тус төслийн ТЭЗҮ, зураг төсөл, техникийн бэлтгэл, байгаль орчны үнэлгээ зэргийг дахин нягталж, банкны шаардлагад нийцэхгүй зүйл байвал арилгах,

Хоёрдугаарт, Сангийн яамны удирдлагуудтай уулзаж, санхүүгийн схемээ хэрхэн хийх тал дээр санал солилцохоор ирсэн. Өөрөөр хэлбэл, төслийн хөрөнгө оруулалтад Кувейтийн санг татан оролцуулахад Сангийн яам ямар байр суурьтай байгаа талаар ярилцах шаардлага тулгарсан” гэдгээ илэрхийлээд төслийн хоёр дахь шат болох Лүнгээс Шинэ Хархорум хот хүртэлх 280 км авто замын бүтээн байгуулалтын төслийг хэрэгжүүлэх тал дээр туслалцаа үзүүлэхэд бэлэн байгаагаа мэдэгдлээ.