Зам, тээврийн яамны Төрийн нарийн бичгийн дарга М.Баярмагнай Бүгд Найрамдах Серби улсын Гадаад харилцааны яамны Төрийн нарийн бичгийн дарга Дамжан Йович тэргүүтэй төлөөлөгчдийг өнөөдөр /2026.05.11/ хүлээн авч уулзлаа.

Уулзалтаар талууд хоёр улсын эдийн засгийн харилцаа, хамтын ажиллагааг өргөжүүлэн хөгжүүлэх талаар санал солилцож, нээлттэй ярилцлаа.

Энэ жил Монгол, Серби улсын дипломат харилцаа тогтоосны 70 жилийн ой тохиож байгаа бөгөөд сүүлийн жилүүдэд хоёр орны харилцаа, хамтын ажиллагаа бүхий л салбарт идэвхтэй гүнзгийрэн хөгжиж, хөгжлийн стратеги, зорилтоо харилцан уялдуулах, худалдаа, эдийн засгийн хамтын ажиллагааг улам өргөжүүлэхэд талууд идэвхтэй хамтран ажиллаж буйг талууд онцлон дурдав.

Статистик дурдахад, Монгол, Сербийн гадаад худалдааны нийт бараа эргэлт 2025 онд 2.2 сая ам.доллар байснаас 0.5 сая ам.долларын бараа бүтээгдэхүүн экспортолсон бол 1.7 сая ам.долларын бараа бүтээгдэхүүн импортолсон байна.

Серби улсын Төрийн нарийн бичгийн даргын энэ удаагийн уулзалтын гол зорилго нь ирэх сард манай улсад албан айлчлал хийх Гадаад харилцааны сайдын айчлалтай холбоотой гэдгээ дурдаад “Энэ удаагийн айлчлалаар олон салбарт хамтын ажиллагааны гэрээ хэлэлцээрийг үзэглэхээр төлөвлөж байна. Мөн “Олон улсын автотээврийн харилцааны тухай Монгол Улсын Засгийн газар, Бүгд Найрамдах Серби Улсын Засгийн газар хоорондын хэлэлцээр”-ийн төслийг ойрын хугацаанд үзэглэх хүсэлтэй байна. Манай улсын хувьд хүнс, хөдөө аж ахуйн чиглэлээр томоохон экспортлогч орны нэг. Энэ чиглэлээр мөн хамтран ажиллах боломжтой” хэмээгээр цаашид бидний хамтын ажиллагаа зам, тээврийн салбарт төдийгүй олон агуулгаар өргөжин хөгжинө гэдэгт итгэлтэй байгаагаа илэрхийлэв.

Зам, тээврийн яамны Төрийн нарийн бичгийн дарга М.Баярмагнай хэлэхдээ “Монгол Улс Европ, Азийн 20 улстай “Засгийн газар хоорондын автотээврийн хэлэлцээр” байгуулж, харилцан зөвшөөрөл солилцон тээвэрлэлт хийж байна. Далайд гарцгүй орны хувьд манай орон хоёр хөршийн нутаг дэвсгэрээр дамжин төмөр зам, автотээвэр, агаарын тээврийн шинэ гарцуудыг нээж, тээврийн дэд бүтцийг хөгжүүлэх нь нэн чухал учраас олон улсын тээврийн коридоруудад нэгдэх хүсэл, сонирхолтой байдаг. Иймд Европ тивийн тээврийн гол коридоруудын нэг болох “Pan European Corridor” дээр байрлаж, Серби Улстай Европын Холбооны тээврийн сүлжээтэй холбогдох чиглэлээр туршлага солилцон хамтран ажиллаж автотээврийн салбарын харилцаагаа өргөжүүлэх боломжтой” гэдгээ мэдэгдлээ.