Монгол Улсын Ерөнхийлөгч У.Хүрэлсүх такси үйлчилгээ эрхлэгчдийн төлөөлөлтэй уулзлаа. Уулзалтад Зам, тээврийн сайд Б.Дэлгэрсайхан, Улсын Их Хурлын гишүүн Х.Ганхуяг, Зам, тээврийн яамны Төрийн нарийн бичгийн дарга М.Баярмагнай, “Юбикаб” ХХК-ийн захирал  О.Золбаяр тэргүүтэй төлөөлөгчид болон такси үйлчилгээ эрхлэгчдийн 800 гаруй төлөөлөл оролцлоо.

Ерөнхийлөгч технологийн дэвшилтэт  төлбөр тооцооны ухаалаг системд суурилсан такси үйлчилгээг нэвтрүүлэн, найдвартай, соёлтой үйлчилгээг нэвтрүүлж байгаа “Юбикаб” ХХК-ийнхан болоод жолоочдод талархал илэрхийлж, амжилт хүслээ. Тэрбээр “Олон мянган хүнийг ажлын байраар хангаж, унаа хүргэлт, шуурхай илгээмжийн зах зээлд өөрсдийн байр сууриа бататгаж, ард иргэдийнхээ аюулгүй, тав тухтай зорчих нөхцөлийг бүрдүүлэхийн төлөө хариуцлагатай ажилладаг та бүхэнтэй миний бие уулзаж байгаадаа баяртай байна. Эх орныхоо хөгжил дэвшилд үнэтэй хувь нэмэр оруулсан “Юбикаб” ХХК-ийн ахмад жолооч Л.Баасанбаярт Монгол Улсын Гавьяат тээвэрчин цол хүртээж, ийнхүү алдаршуулж байна” гэлээ.

Үүнийхээ дараа сүүлийн жилүүдэд хийсэн ажил, үндэсний хэмжээнд өрнүүлж байгаа хөдөлгөөн, хөтөлбөрүүдийн хэрэгжилт, гадаад харилцаа, нийгэм, эдийн засгийн байдал зэргийн талаар товч танилцууллаа. Өнгөрсөн онд Монгол Улсын эдийн засаг 6.8 хувиар өсөн, нэг хүнд ногдох Дотоодын нийт бүтээгдэхүүн 7,000 ам.доллар болж, худалдаа, хөрөнгө оруулалт нэмэгджээ.

Энэ үеэр Зам, тээврийн сайд Б.Дэлгэрсайхан зам, тээврийн салбарт ажиллаж буй такси үйлчилгээний эрхлэгчдийн төлөөлөлтэй уулзаж байгаа Ерөнхийлөгчид талархал илэрхийлээд, тээврийн салбар нь Монгол Улсын ДНБ-ний 8 орчим хувь, нийт ажиллах хүчний 6-8 хувийг эзэлдэг, улсын нийгэм эдийн засагт чухал нөлөө үзүүлдэг томоохон салбарын нэг гэдгийг онцлон тэмдэглэв.

Мөн Монгол Улсын Ерөнхийлөгч У.Хүрэлсүхийн санаачилгаар “Транзит Монгол” үндэсний хөтөлбөрийг хэрэгжүүлж Монгол Улс Ази, Европыг холбосон тээвэр логистикийн зангилаа төв болох зорилтыг дэвшүүлэн ажилласны үр дүнд бүх төрлийн тээврээс зорчигч тээвэрлэлтийн 97 хувь, ачаа тээвэрлэлтийн 66 хувийг автотээврийн салбар гүйцэтгэж, нийт 20 улстай автотээврийн харилцааны хэлэлцээр байгуулж, 25 улстай олон улсын тээвэрлэлт хийж монголын тээвэрчид олон улсын тээвэрлэлтэд 40 хувийг эзэлж байгааг дурдлаа.

Ерөнхийлөгчийг Монгол Улсын Ерөнхий сайдаар ажиллаж байх үед Засгийн газраас зам, тээврийн чиглэлээр хэд хэдэн чухал эрх зүйн баримт бичгийг батлан гаргасны дунд анх удаа “Төрөөс автотээврийн талаар баримтлах бодлого”-г баталж байсан нь салбарын хөгжилд чухал ач холбогдол үзүүлсэн юм.

Уулзалтын үеэр Монгол Улсын Ерөнхийлөгч У.Хүрэлсүх “Эзэн Богд Чингис хааны эш хөрөг”-ийг такси үйлчилгээ эрхлэгчдийн төлөөлөл “Юбикаб” ХХК-ийн захиралд гардуулан өгч, нэр бүхий хүмүүсийг төрийн дээд одон, медалиар шагналаа.

Дашрамд дурдахад, Монгол Улсын зам, тээврийн салбарт ажиллаж буй нийт ажилтан, албан хаагч нар “Тэрбум мод” үндэсний хөтөлбөрийн хүрээнд 2030 он хүртэл 7,1 сая ширхэг мод тарих зорилт тавьснаас өнөөдрийн байдлаар 700 орчим мянган мод тариад байна.