Дэлхийн банкны санхүүжилтээр хэрэгжиж буй “Улаанбаатар хотын тогтвортой авто зам, тээвэр төсөл”-ийн гуравдугаар бүрэлдэхүүн хэсэг, Нийтийн тээврийн стратеги боловсруулах зөвлөх үйлчилгээний нэг хэсэг болон хэрэгжиж буй “Улаанбаатар хотын Нийтийн тээврийн стратеги” төслийн хаалтын семинар өнөөдөр /2026.05.28/ боллоо.

Энэхүү семинар нь Улаанбаатар хотын тогтвортой хотын хөгжлийг дэмжихэд чиглэсэн “Нийтийн тээврийн стратеги болон стратегийн төлөвлөгөө”-г амжилттай хэрэгжүүлэх арга зам, шийдлийг танилцуулах зорилготой юм.

Энэ үеэр Улаанбаатар хотын стратеги, хэрэгжүүлэх арга хэмжээний төлөвлөгөө болон Азийн улс орнуудын нийтийн тээврийн тогтвортой сайн туршлагыг танилцуулж, Улаанбаатар хот 2050 онд зорчилт хөдөлгөөний хувьд хүртээмжтэй, байгальд ээлтэй, тогтвортой, ухаалаг, амьдрахад таатай хот болгох алсын хараа, төслийн хүрэх үр дүнгийн хамт танилцууллаа.

Мөн стратегийн үр дүнтэй хэрэгжилт, урт хугацааны тогтвортой байдлыг хангахад бүх оролцогч талын нягт хамтын ажиллагаа, идэвхтэй, уялдаа холбоо чухал болохыг экспертүүд онцлон тэмдэглэлээ.

Төслийн багийн ахлагч,  БНХАУ-ын Цинхуа их сургуулийн Тээврийн инженерийн хүрээлэнгийн захирал Хуапү Лугийн илтгэлд дурдсанаар “Улаанбаатар хотын гол гудамж, зам дагуу хөдөлгөөнд оролцож буй хувийн тээврийн хэрэгслийн дундаж хурд 7 км/цаг, нийтийн тээврийн дундаж хурд 10 км/цаг байна. Харин өглөө, оройн оргил ачааллын үед зорчих хурд ойролцоогоор 5 км/цаг хүртэл буурч, хотын төв хэсэгт хөдөлгөөн бараг зогсолтын байдалд хүрдэг. Мөн хүн амын төвлөрөл, автомашины хэрэглээ тасралтгүй нэмэгдсэнээс замын хөдөлгөөний ачаалал жилд дунджаар 18 хувиар өсч байгаа судалгаа гарсан. Эдгээр хүндрэл нь иргэдийн өдөр тутмын амьдрал, ажлын бүтээмжид шууд нөлөөлж, нийтийн тээврийн системийн үр ашиг ч буурч байна. Хэдийгээр сүүлийн жилүүдэд парк шинэчлэл тодорхой хэмжээнд хийгдсэн ч, нийт системийн ачааллыг дангаар шийдвэрлэхэд хангалтгүй хэвээр байсаар байна. Иймээс Улаанбаатар хотын хувьд замын хөдөлгөөний түгжрэлийг бууруулахын тулд их багтаамжтай, хурдтай, замын хөдөлгөөний нөхцөлөөс хараат бус нийтийн тээврийн шинэ шатанд шилжих зайлшгүй шаардлага тулгарч байна. Иймд тээвэрт суурилсан хөгжил буюу нийтийн тээвэр, явган зорчих, дугуй унахыг үндсэн тээврийн хэлбэр болгон дэмжих хот байгуулалтын загварыг хөгжүүлж, олон талт, идэвхтэй, амьдрахад таатай орчин бүрдүүлэх шаардлагатайг энэхүү судалгаа харуулж байна” хэмээлээ.