“Цөлжилттэй тэмцэх тухай Нэгдсэн үндэстний байгууллагын конвенцын Талуудын 17 дугаар бага хурал” 10 дахь өдрөө үргэлжилж байна. Бага хурлын хүрээнд Монгол Улсын Зам, тээврийн яамнаас "Саад бэрхшээлээс холболт руу: Зэрлэг амьтдад ээлтэй дэд бүтцийн практик шийдэл" сэдэвт арга хэмжээг өнөөдөр /2026.08.26/ зохион байгууллаа.

Энэхүү арга хэмжээг Зам, тээврийн яам, Байгаль орчин, уур амьсгалын өөрчлөлтийн яам, Дэлхийн байгаль хамгаалах сан, Байгаль, зэрлэг амьтдыг хамгаалах нийгэмлэг зэрэг холбогдох байгаль орчныг хамгаалах олон улсын байгууллагуудтай хамтран зохион байгуулж байгаа бөгөөд биологийн олон янз байдлыг хамгаалах чиглэлээр Монгол Улсын нэгдэн орсон олон улсын гэрээ, конвенцын хэрэгжилтийг хангахад төрийн болон төрийн бус байгууллагууд, гадаадын олон улсын байгууллагууд, мэргэжлийн холбоод, хувийн хэвшил, ард иргэдийн хамтын ажиллагааны идэвхтэй оролцоо туйлаас чухал юм. Хэлэлцүүлгийн зорилго нь авто замын болон төмөр замын тээврийн хөдөлгөөний аюулгүй байдлыг бүрэн хангах, дэд бүтцийн уялдаа холбоог бий болгох, шинэ дэвшилтэт техник, технологийг нэвтрүүлэхдээ байгаль орчинд үзүүлэх сөрөг нөлөөллийг багасгах сайн туршлагуудыг хуваалцахад оршиж байгаа юм.

Арга хэмжээг нээж, Зам, тээврийн сайд Б.Дэлгэрсайхан хэлсэн үгэндээ сүүлийн 4 жилд авто зам, төмөр замын салбаруудын бүтээн байгуулалтын хүрээнд 2000 гаруй км шугаман байгууламжийн дагуу нийтдээ 500 орчим байршилд зэрлэг амьтдад зориулсан нэг түвшиний гарам болон нүхэн гарцуудыг стандартын шаардлагад нийцүүлэн барьж байгуулсныг онцлов. Мөн цаашид төлөвлөгдөж байгаа авто зам болон төмөр замын дагуу тээврийн хэрэгслийн хөдөлгөөний аюулгүй байдлыг бүрэн хангах хүрээнд нүхэн гарц болон хоёр дахь түвшний гүүрэн байгууламжуудыг хийхэд илүү зорин, төлөвлөн, барих шаардлагатай байгааг дуулгалаа.

Хэлэлцүүлгийн үеэр зэрлэг амьтдын нүүдлийн шилжилт, хөдөлгөөний нарийвчилсан судалгааг үндэслэн баригдах дэд бүтцийн байршлыг оновчтой тодорхойлон барьж байгуулах талаар байгаль орчны яам, холбогдох олон улсын байгууллагууд,  хөгжлийн түншүүдтэй нягт хамтран үр дүнтэйг хэрэгжүүлэх нь чухал байгааг экспертүүд хэлж байлаа.

Цаашид авто зам болон төмөр замуудынхаа зураг төсөлд зэрлэг амьтдад зориулсан гарц, гармыг зайлшгүй тусган хэрэгжүүлэхийн тул анхлан төлөвлөхдөө төслийнхөө ажлын даалгаврын онцгой нөхцөлд зааж өгөх, цаашлаад зураг төслийг магадлах шатандаа авто зам болон төмөр замын зөвлөх инженер, экспертүүд нь тухайн бүс нутгийнхаа тууртан амьтан судлаачидтай хамтран ажиллаж, зөвлөмж, дүгнэлт гаргах  шаардлагатай байна.

Дээрх бодлогын хүрээнд Монгол Улсын авто зам болон төмөр замуудын тээврийн хөдөлгөөний аюулгүй байдлыг бүрэн хангах, мөн Монгол Улсын нэгдэн орсон “Зэрлэг амьтдын нүүдлийн зүйлүүдийг хамгаалах олон улсын конвенц”-ын өмнө хүлээсэн үүргээ биелүүлэх зорилгоор зэрлэг амьтдын аливаа нүүдэл, шилжилт хөдөлгөөнийг хязгаарлах, мөн хориг хашаанд орооцолдох, гэмтэх, хорогдох эрсдэл зэргийг бууруулан шугаман байгууламж дагуу зориулалтын гарц, гармыг олноор барьж байгуулах, зэрлэг амьтад аюулгүй хөндлөн гарах боломжийг бүрдүүлэх нь чухал юм.