Засгийн газрын өнөөдрийн хуралдаанаар хэлэлцэн шийдвэрлэсэн зарим асуудлыг танилцуулж байна.

“ОЮУ ТОЛГОЙ”-Н НОГДОЛ АШГИЙН ОРЛОГООР САНХҮҮЖҮҮЛЭХ ЗАРДАЛД ИРГЭДИЙН САНАЛЫГ АВЧ БАЙНА

”Оюу толгой” төслөөс хүртэх ногдол ашгийн орлогоор санхүүжүүлэх зардлын талаар иргэдийн саналыг “Төрийн үйлчилгээний нэгдсэн систем (e-Mongolia)”-ээр авахаар шийдвэрлэлээ. Нээлттэй санал асуулга 2026 оны аравдугаар сарын 14-ний өдрийн 09:00 цагт эхэлсэн бөгөөд энэ сарын 28-ны өдрийн 22:00 цаг хүртэл үргэлжилнэ. Иргэд та бүхэн e-Mongolia болон И-Засаг цахим системээр дамжуулан саналаа өгөх боломжтой.

ЗӨВШӨӨРӨЛ, МЭДЭГДЛИЙН ТУХАЙ ХУУЛИЙН ХЭРЭГЖИЛТЭД ХЯНАЛТ ТАВЬЖ, ХАРИУЦЛАГА ТООЦНО

Зөвшөөрөл, мэдэгдлийн тухай хуулийн хэрэгжилтийг хангаж ажиллаагүй эрх бүхий албан тушаалтанд холбогдох хууль тогтоомжийн дагуу хариуцлага тооцохоор шийдвэрлэлээ.

ОРОН СУУЦНЫ МЭДЭЭЛЛИЙГ QR КОДООР БҮРТГЭЖ, ИРГЭДИЙГ ЗАЛИЛАНГААС СЭРГИЙЛНЭ

Орон сууцны мэдээллийг QR кодоор бүртгэлжүүлэх замаар мэдээллийн ил тод, хүртээмжтэй байдлыг нэмэгдүүлж, иргэдийг үл хөдлөх хөрөнгөтэй холбоотой залилангийн гэмт хэргээс урьдчилан сэргийлэх арга хэмжээ авна.

3,169.42 ГА АТАР ГАЗРЫГ ТАРИАЛАНГИЙН ГАЗАРТ ШИЛЖҮҮЛЛЭЭ

Говь-Алтай аймгийн Тайшир, Төв аймгийн Аргалант, Батсүмбэр, Баяндэлгэр, Баянчандмань, Цээл, Сэргэлэн, Эрдэнэ сумын нутаг дэвсгэр дэх нийт 3,169.42 га атар газрыг тариалангийн газарт шилжүүллээ.

ГАЗРЫН ТОСНЫ ХАЙГУУЛ, АШИГЛАЛТЫН ТАЛБАЙН ХАМГААЛАЛТЫГ ЗОХИОН БАЙГУУЛНА

Газрын тосны хайгуул, ашиглалтын талбайг Дотоодын цэргийн хамгаалалтад авах ажлыг зохион байгуулахыг холбогдох байгууллагуудад даалгалаа.